شعر شور انگیز از شمس الرحمٰن فاروقی

25 دسمبر 2020ء کو ہمارے عہد کے سب سے ممتاز ناقد شمس الرحمٰن فاروقی اپنے خالقِ حقیقی سے جا ملے۔ ان کا سب سے بڑا کارنامہ "شعرِ شور انگیز" ہے۔ یہ خدائے سخن میر تقی میرؔ کے چھے دواوین کا اتنخاب اور شرح و تفسیر ہے۔ اس کتاب کو چار جلدوں میں تقسیم کیا گیا ہے۔

فاروقی صاحب کی تنقید نگاری کا وصف ان کی اجتہادی شان بھی ہے مگر کبھی ان کے فیصلے دو ٹوک ہوتے ہیں کہ صرف اس قطعیت کی وجہ سے ان سے اختلاف کرنے کو جی چاہتا ہے۔ کلامِ غالبؔ کی 36 مکمل شرحیں اور اتنی ہی جزوی شرحیں لکھی جا چکی ہیں مگر کلامِ میرؔ کی ایک شرح کی بھی ضرورت نہیں سمجھی گئی۔ حالانکہ یہ محض واہمہ ہے۔ میرؔ بھی خوب جی بھر کر صنائع لفظی و بدائع معنوی کا استعمال کرتا ہے۔ زبان کی نزاکتوں پر میرؔ کی نظر غالبؔ سے زیادہ گہری ہے۔ اس زمانے کی معاشرت اور تہذیب کی جھلکیاں بھی ان کے کلام میں ایسی ملتی ہیں کہ جو شخص آخر عہدِ مغلیہ کی تہذیب اور کاروبارِ زندگی سے اچھی واقفیت نہ رکھتا ہو میر کے اشعار سے پورا لطف اور لذت کشید نہیں کر سکتا۔ مثلاََ میرؔ کا ایک شعر ہے:

لے سانس بھی آہستہ کے نازک ہے بہت کام

آفاق کی اس کارگہِ شیشہ گری کا

بظاہر سیدھا سادا شعر ہے مگر اس کا صحیح مفہوم وہ سمجھ سکتا ہے جسے معلوم ہو کہ پہلے زمانے میں کانچ کے برتن اس طرح بنائے جاتے تھے کہ شیشے کو ایک کڑھاؤ میں پکایا جاتا تھا، وہ گاڑھا سیال مادہ بن جاتا تھا۔ پھر ایک لمبی نلکی کا ایک سرا کڑھاؤ میں ڈال کر دوسرے سرے کو منہ میں لے کر سانس اوپر کھینچتے تھے تو وہ سیال شیشہ نلکی میں بھر جاتا تھا پھر اس نلکی کا ایک سرا لکڑی کے سانچے میں رکھ کر سانس پھونکتے تھے تو وہ سیال اس سانچے میں منتقل ہو جاتا تھا اورا ٹھنڈا ہو کر برتن کی شکل میں نکلتا تھا، یہ سب کاریگری سانس کی تھی اگر کڑھاؤ سے شیشہ لیتے وقت سانس ذرا زور سے کھینچ لیں تو کاریگر مر سکتا تھا اور سانچے میں چھوڑتے وقت سانس کا دباؤ زیادہ ہو جائے تو برتن بے ہنگم بن جاتا تھا۔ میرؔ نے دنیا کو کارگہِ شیشہ گری سے تشبیہہ دی ہے اور نہایت حزم و احتیاط کے ساتھ زندگی گزارنے کی تلقین ایک نہایت خوبصورت تمثیل کے ساتھ کی ہے۔ اسے تصوف کی طرف محمول کریں تو یہی "پاس انفاس" اور "ہوش دردم" کا عمل ہے۔ ایسی تفصیلات جانے بغیر میرؔ کا کلام سر کے اُوپر سے گزر جائے گا۔

{getButton} $text={Download} $icon={download}

ذیل میں شعرِ شور انگیز کی چار جلدیں مہیا کی گئی ہیں امید واثق ہے کہ کلام میر کے شیدائی ان سے بھرپور استفادہ کر سکیں گے۔