آرٹ کی تعریف اور مثالیں

 حسن کے تخلیقی اظہار کا ہنر آرٹ کہلاتا ہے۔ زندگی کے واقعات کو جمالیاتی اظہار دینا آرٹ کا منصب ہے۔ گویا آرٹ زندگی کے واقعات کی جمالیاتی تصدیق یا تردید کا نام ہے۔ آرٹ صورت آفرینی کا ایسا عمل ہے۔ جس میں انسانی ذات کو مختارِ کل کی حیثیت حاصل ہو۔

 آرٹ کے زمرے میں شاعری، ادب (لٹریچر کی تمام خلقی اصناف) موسیقی، مصوری اور بت تراشی آتی ہیں۔ ان تمام فنون میں ذریعہء اظہار مختلف ہے۔ تخیل کی کارفرمائی کی سطحیں بھی جداگانہ ہیں۔ لیکن ان سب کے پس پردہ جمالیات کی عمل داری کی قوت اصولی اعتبار سے ایک ہی ہے۔ 

آرٹ کیلیے، ہیت (FORM) شکل و صورت اور پیکر ناگزیر ہے۔ جونہی فطرت کے خارجی مظاہر پر روحِ انسانی اس طرح عمل کرے کے کہ وہ کسی SHAPE میں ظہور پزیر ہو جائے تو آرٹ جنم لیتا ہے۔ یوں آرٹ کی تعریف بھی قابلِ غور ہے کہ " آرٹ فطرت کے خام مواد پر یا مظاہر فطرت پر روحِ انسانی کے عمل کا نام ہے"۔ کاسیرے CASSIRER  کا قول ہے کہ "فن کی ایک تعریف یہ بھی ہو سکتی ہے کہ وہ ایک علامتی زبان ہے"۔