اختر عثمان کی شاعری (حصہ سوم)

41-

آئنے ٹوٹ گئے باتوں کے

دل میں ریزے ہیں ملاقاتوں کے

42-

کئی پہلو، کئی پرتَو، کئی پیرائے ہیں

عمر بھر ایک طرف کو نہیں بہتا دریا

43-

بزمِ نمود و نام سجی، شور سا اٹھا

میں چل دیا کہ راس نہ تھی ہاؤ ہو مجھے

44-

تُو نہیں ہے تو زہر لگتی ہے

میکدے کی یہ ہاؤ ہُو اے دوست!

45-

سیدھے سبھاؤ زیست سمجھنا محال ہے

اس کام کو بھی چاہیے مجھ سا ہی سر پھرا

46-

بلا کا روگ ہے تہہ داریِ تجسس بھی

سوال اور اٹھیں اک سوال اگر نکلے

اختر عثمان کی شاعری (حصہ اول)

اختر عثمان کی شاعری (حصہ دوم)

47-

سال کٹ گئے کتنے شعر کے ریاض اندر

تب کہیں بیاض اندر لفظ بولتا دیکھا

48-

شبِ ہجراں تجھے معلوم کب ہے

میں تیرے ساتھ کب کا جاگتا ہوں

جگانے جب کوئی آتا ہے اخترؔ

تو کہہ دیتا ہوں "اچھا جاگتا ہوں"

49-

کیا داستانِ عہدِ گزشتہ رقم کریں

وہ خواب، وہ نشہ، وہ فسوں کھا گئی ہوا

50-

پرائے سائے سے خائف ہوں، چھت سے ڈرتا ہوں

نیا نیا ہوں، ابھی مصلحت سے ڈرتا ہوں