جنوں اور وحشت پر اردو اشعار

☆

میں وہ مجنوں ہوں کہ مجنوں بھی ہمیشہ خط میں

قبلہ و کعبہ لکھا کرتا تھا القاب مجھے

(ذوق دہلوی)

☆

میرے حواس عشق میں کیا کم ہیں منتشر

مجنوں کا نام ہو گیا قسمت کی بات ہے

(اکبر اِلٰہ آبادی)

☆

خدا شرمائے ہاتھوں کو کہ رکھتے ہیں کشاکش میں

کبھی میرے گریباں کو، کبھی جاناں کے دامن کو

(مرزا غالب)

☆

یہ جوشِ جنوں رنگ لانے لگا

گریباں تک اب ہاتھ جانے لگا

(بیخود دہلوی)

☆

ہمارا دشتِ وحشت بھی کہیں بیکار رہتا ہے

نہ جب باقی رہا اپنا تو ناصح کا گریباں تھا

(حیراں بریلوی)

☆

دلِ وحشی کو خواہش ہے تمہارے دَر پہ آنے کی

دیوانہ ہے ولیکن بات کہتا ہے ٹھکانے کی

(قلندر بخش جرات)

☆

تھی وہ مجنوں کے دَم ہی تک رونق

خاک اُڑتی ہے اب بیاباں میں

(میر مجروح دہلوی)

☆

عشق مجھ کو نہیں وحشت ہی سہی

میری وحشت تری شہرت ہی سہی
(مرزا غالب)

☆

خبرِ تحیرِ عشق سن! نہ جنوں رہا نہ پری رہی

نہ تو تُو رہا نہ تو میں رہا، جو رہی سو بے خبری رہی

(سراج اورنگ آبادی)

☆

اے عشق جنوں پیشہ! ہاں عشق جنوں پیشہ

آج  اک ستم گر کو ہنس ہنس کے رُلانا ہے

(جگر مراد آبادی)

☆

مرے جنوں کا نتیجہ ضرور نکلے گا

اسی سیاہ سمندر سے نور نکلے گا

(آغا قزلباش)

☆

بک رہا ہوں جنوں میں کیا کیا کچھ

کچھ نہ سمجھے ۔ خدا کرے کوئی

(مرزا غالبؔ)

☆

کیا جانیے کیا ہو گیا اربابِ جنوں کو!

مرنے کی ادا یاد نہ جینے کی ادا یاد

(جگر مراد آبادی)

☆

اب جنوں حد سے بڑھ چلا ہے

اب طبعیت بہل چلی ہے

(فیض احمد فیض)

☆

کیا صوفی و ملا کو خبر میرے جنوں کی

ان کا سرِ دامن بھی ابھی چاک نہیں ہے

(علامہ اقبال)

☆

یا رب! کسی کے رازِ محبت کی خیر ہو

دستِ جنوں رہے نہ رہے آستیں رہے

(جگر مراد آبادی)

☆

انہیں کے فیض سے بازارِ عقل روشن ہے

جو گاہ گاہ جنوں اختیار کرتے رہے

(فیض احمد فیض)

☆

جلا کے مشعلِ جاں ہم جنوں صِفات چلے

جو گھر کو آگ لگائے ہمارے ساتھ چلے

(مجروح سلطان پوری)

☆

قبا ایک دن چاک اس کی بھی ہوگی

جنوں کب کسی کی رعایت کرے ہے

(کلیم عاجز)

☆

اے قیس جنوں پیشہ! انشاؔ کو کبھی دیکھا

وحشی ہو تو ایسا ہو، رُسوا ہو تو ایسا ہو

(ابنِ انشاؔ)