حنا پر خوبصورت اشعار کا مجموعہ

☆

وہ جان بوجھ کے مہندی لگائے بیٹھے ہیں

بہانہ باز بہانہ بنائے بیٹھے ہیں

(اشک بلند شہری)

☆

بتاؤ کیا کرو ایسے میں چھیڑیں ہم اگر تم کو

لگائے مہندی تم بیٹھے تو ہو بے دست و پا ہو کر

(ریاض خیر آبادی)

☆

کٹی، کچلی گئی، پس کر چھنی، بھیگی، گندھی مہندی

جب اتنے دکھ سہے تب ان کے قدموں سے لگی مہندی

(انشااللہ خاں انشا)

☆

بانکی ادا سے قتل انہوں نے کیا ہمیں

مہندی لگا کے پاؤں میں پنجوں کے بل چلے

(آتش)

☆

اللہ رے نازکی کہ جوابِ سلام میں

ہاتھ ان کا اٹھ کے رہ گیا، مہندی کے بوجھ سے

(ریاض خیر آبادی)

☆

مَل رہے ہیں وہ اپنے گھر مہندی

ہم یہاں ایڑیاں رگڑتے ہیں

(مادھو رام جوہر)

☆

یہ بھی نیا ستم ہے حنا تو لگائیں غیر

اور اس کی داد چاہیں وہ مجھ کو دکھا کے ہاتھ

(نظام رامپوری)