بہ رسم و راہِ رقیباں گزر رہی ہے حیات - لیاقت علی عاصم

بہ رسم و راہِ رقیباں گزر رہی ہے حیات

گزر رہی ہے مری جاں گزر رہی ہے حیات

کہیں  فراقِ مسلسل کہیں وصال بحال

کہیں کٹھن کہیں آساں گزر رہی ہے حیات

بھرا ہوا ہے کہیں آگ سے شکم کا تنور

کہیں خلال بدنداں گزر رہی ہے حیات

سوادِ رشک و حسد سے لیے ہوئے مجھ کو

مرے گریز پہ حیراں گزر رہی ہے حیات

خراش ہے نہ کوئی زخم ہے بدن پہ کہیں

اگرچہ دست و گریباں گزر رہی ہے حیات

نہ پیرہن پہ نظر ہے نہ کچھ بدل کا خیال

ہوا کی طرح پریشاں گزر رہی ہے حیات

تکلفاتِ نگار و نگاہ کیا کہیے

عصا بدست نگہباں گزر رہی ہے حیات

نہ روشنی ہی زیادہ نہ تیرگی کچھ کم

سرِ ستارہ و مژگاں گزر رہی ہے حیات

عجیب عالمِ وحشت ہے شہر میں عاصمؔ

کئی دنوں سے پسِ جاں گزر رہی ہے حیات

--------

لیاقت علی عاصم