عدو محفل سے ٹل جائے تو اچھا - کنور مہندر سنگھ بیدی سحرؔ

 عدو محفل سے ٹل جائے تو اچھا

یہ کانٹا بھی نکل جائے تو اچھا

اسے دو ایک جُرعے اور دے دو

یہ دیوانہ سنبھل جائے تو اچھا

تمہاری خُو نہ بدلی ہے نہ بدلے گی

ہمارا دل بدل جائے تو اچھا

گھٹا ہے، ابر ہے، تم ہو، ہوا ہے

اگر اب دَور چل جائے تو اچھا

ہمیں دَیر و حرم سے ضد نہیں ہے

یہاں ہی دل بہل جائے تو اچھا

سحرؔ اب موت کا ارماں ہے باقی

یہ ارماں بھی نکل جائے تو اچھا

۔۔۔۔۔۔۔۔۔۔۔۔۔۔

کنور مہندر سنگھ بیدی سحرؔ