جوشِ ابرِ بہار کیا کہنا - کنور مہندر سنگھ بیدی سحرؔ

 جوشِ ابرِ بہار کیا کہنا

دیدہء اشکبار کیا کہنا

دلِ مظطر کو اور فرقت میں

درسِ صبر و قرار کیا کہنا

عرضِ مطلب پہ ہنس کے کہتے ہیں

ہم کریں تم سے پیار کیا کہنا

مجھ میں اور آپ میں تقابل کیا

اک خزاں اک بہار کیا کہنا

تیرے وعدے کا اب اے وعدہ شکن

ہم کریں اعتبار کیا کہنا

نوجوانی میں حضرتِ ناصح

دل پہ ہو اختیار کیا کہنا

ہے یہ تیرا کرم کہ جیتے ہیں

لذتِ انتظار کیا کہنا

ظلمتِ ہجر میں چراغاں ہے

اے دلِ داغدار کیا کہنا

حالِ دل ہم نے اے سحرؔ اُن کو

کہہ دیا بار بار کیا کہنا

۔۔۔۔۔۔۔

کنور مہندر سنگھ بیدی سحرؔ