انکار پر اردو شاعری

جھوٹا ہی کیوں نہ کیجے ۔ وعدہ تو کیجے

انکار سنتے سنتے برسوں گزر گئے

۔۔۔۔۔۔

بیخود دھلوی

اتنی بھی کسی بات پہ یوں ہٹ نہیں کرتے

اتنا بھی بس انکار مری جاں نہیں ہوتا

۔۔۔۔۔۔۔۔۔۔

بیخود دھلوی

آ کے قابو میں نہ کہیے پیار رہنے دیجیے

پیارے پیارے منھ سے اب انکار رہنے دیجیے

۔۔۔۔۔۔۔۔

ریاضؔ گورکھپوری

روز کہتے ہو تم کہ آج نہیں

اس مرض کا کوئی علاج نہیں

۔۔۔۔۔۔

مست بنارسی

دستِ شوق ہائے جھٹک کر یہ کسی کا کہنا

منھ لگانا ہی غضب ہو گیا ۔ اِترا ہی گیا

۔۔۔۔۔۔۔۔۔۔

مفتون دھلوی

یاد کی شرط لگا دیتے ہو وعدہ کر کے

خوب انکار کا پہلو ہے یہ اقرار کے ساتھ

۔۔۔۔۔۔۔۔۔

قیصر دھلوی

گالی سہی، ادا سہی، چیں جبیں سہی

یہ سب سہی پر ایک نہیں کی نہیں سہی

۔۔۔۔۔۔۔۔۔

انشا اللہ خاں انشا

آپ کرتے ہیں بار بار نہیں

ہم کو ہاں کا بھی اعتبار نہیں

۔۔۔۔۔۔۔۔۔۔

روشن بریلوی

دشوار ہے رندوں پر، انکارِ کرم یکسر

اے ساقیِ جاں پرور، کچھ لطف و عنایت بھی

۔۔۔۔۔۔۔۔۔۔۔

حسرتؔ موہانی